Од Автомото сојузот на Македонија (АМСМ) утрово информираат дека на граничниот премин „Табановце“, за влез и за излез од државата, се чека околу 30 минути, а на останатите гранични премини од македонска страна нема подолги задржувања.
Сообраќајот на државните патишта се одвива непречено и по суви коловози. Интензитетот на сообраќај на патните правци надвор од градските средини е умерен.
АМСМ им препорачува на возачите да ја прилагодат брзината на движење, да ја почитуваат поставената сообраќајна сигнализација и внимателно да управуваат со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.