Лидерот на СДСМ, Зоран Заев, не ја исклучува можноста Специјалниот јавен обвинител да ги разгледува и случаите „Куманово“, „Монструм“, „Маѓар телеком“ и случајот на лидерот на партијата Обединети за Македонија, Љубе Бошкоски.
Заев, одговарајќи на новинарско прашање, денеска кажа дека надлежност на специјалниот обвинител ќе биде сè она што се спомнува во „бомбите“.
– Ако има разговори за „Монструм“, а како што знаеме сите, има такви разговори од неовластеното прислушување, тогаш тој случај влегува под надлежност на специјалното обвинителство. Ако има разговори за „Маѓар телеком“, тогаш и тоа ќе биде предмет на разгледување од специјалниот обвинител – одговори Заев.
На прашање дали постојат снимени разговори во кои се споменува случајот со „Маѓар телеком“, Заев рече дека тоа ќе го остави на обвинителството.