Во денешната полициска акција во Куманово, животот го загубиле тројца полицајци, а 22-ца се ранети. Детали за акцијата и натаму не се откриваат, а МВР се уште нема најавено прес-конференција, јавува АлсатМ
Во меѓувреме едната терористичка група од околу 30 – тина лица ѝ се предала на полицијата, а мала група од околу 10 лица е засолната во куќа и одбива да се предаде.
Екипата на Алсат од теренот информира дека во Куманово и натаму интензивно се пука.
Портпаролот на МВР Иво Котевски на прес-конференција во 14 часот информира дека терористичката група имала за цел да организира напади врз државни институции, а во Македонија влегла од една соседна држава.
– На нападот е одговорено исклучително внимателно и соодветно на ситуацијата. Апелираме граѓаните и јавноста да останат мирни, да се воздржуваат, а заради чувствителноста на ситуацијата во овој момент не би соопштувале дополнителни детали, рече Котески и најави дека МВР подоцна ќе излезе со целосни информации за преземените мерки.
Апели за смиреност и неподлегнување на провокации упатија и политичките партии, ЕУ, САД, Русија и ОБСЕ