ЗАПАДОТ се обидува да ја скрши Русија, но нема да успее, изјави рускиот претседател Владимир Путин пред неколку дена на церемонијата по повод Денот на националните херои, кога земјата доделуваше медали „Златна ѕвезда“.
Како што покажуваат оригиналните снимки од програмата „Москва. Кремљ. Путин“, кои денеска беа објавени во одредени медиуми, Путин истакна дека денес иднината на целата земја зависи од војската.
Тој рече дека знае дека не е лесно да се биде на фронтот и дека откако прочитал повеќе детали за борците на кои им беше доделен медалот, бил импресиониран од она што го дознал.
– Ќе дојде време, ништо нема да заборавиме – коментираше тој.
Путин потсети и дека денес Западот е подготвен да соработува со секого само за да и нанесе штета на Русија. Тој додаде дека, очигледно, украинските власти „целосно полуделе“ кога решиле да ги прогласат Русите за неавтохтон народ на украинска почва.
– Мораме да ги заштитиме нашите момчиња и да дејствуваме – рекол Путин во разговор со еден од наградените.
– Никогаш нема да успеат да ја истиснат, ослабат или скршат Русија – заклучи тој.