Царинската управа информира дека во денешна акција против нелегалната продажба на режан тутун низ пазарите на територија на град Скопје, запленети се 214 килограми режан тутун.
-Со ова се избегнати давачки за акциза во износ од околу 440.000 денари. Против сторителите ќе бидат поднесени соодветни пријави за нелегално продавање на производи кои претставуваат акцизни добра. Царинската управа во текот на оваа година има спроведено 5 акции против нелегална продажба на тутун и тутунски производи кои резултирале со 7 кривични дела и 3 прекршочни постапки против сторителите. Имено, кривичните дела се однесуваат на избегнување на плаќање акциза, а прекршоците за пуштање во промет акцизни добра кои не се обележани со акцизна марка, велат од Управата.
Од институцијата додаваат дека период од 01.01.2021 до 10.12.2021 во акции по пазарите, Царинската управа вкупно има запленето 10.440 цигари и околу 1,413 кг режан тутун.