Федералните медицински агенции на САД вчера препорачаа да се прекине употребата на вакцината против ковид-19 произведена од компанијата „Џонсон и Џонсон“, откако шест жени на возраст под 50 години развија редок синдром на згрутчување на крвта, што претставува нов удар врз напорите за запирање на пандемијата.
Администрацијата за храна и лекови на САД (ФДА) соопшти дека очекуваат паузата во вакцинацијата со вакцината на „Џонсон и Џонсон“ да трае неколку дена и дека целта е всушност да им се дадат информации на медицинските работници за да можат да дијагностицираат, лекуваат и пријавуваат случаи на згрутчување на крвта. Питер Маркс, од ФДА, рече дека вакцинацијата е делумно паузирана за да ги предупреди лекарите дека примената на стандардна терапија за тромбоза во овие случаи може да предизвика огромна штета или да биде фатална.
По објавувањето на суспензијата, од компанијата „Џонсон и Џонсон“ беше соопштено дека ќе ја одложи испораката на вакцини во Европа.
Одлуката за вакцината на „Џонсон и Џонсон“ беше донесена откако европската регулаторна агенција објави на почетокот на овој месец дека воспоставиле можна врска помеѓу вакцината на „АстраЗенека“ и сличен проблем на формирање на тромбови, што доведе до одреден број смртни случаи.
Вакцината која се дава во една доза на „Џонсон и Џонсон“ и евтината вакцина на „АстраЗенека“ се сметаат за клучни инструменти во борбата против пандемијата.
Експертите за имунологија истакнуваат дека ризикот што го носи вакцината на „Џонсон и Џонсон“ се чини дека е исклучително мал и дека вакцината останува вредно оружје против ковид-19. Сепак, тие признаа дека е неопходно здравствените службеници да приоѓаат со голема претпазливост за да се утврдат најдобрите начини за намалување на ризикот.