Премиерот Христијан Мицкоски го повтори ставот дека не треба да се игра на етничка и верска карта бидејќи, како што вели, тоа е картата на криминалците кои што изминатите години печалеа на грбот на народот, ќе се обидат да предизвикаат нестабилност.
За случувањата со црквата во село Галате и вчерашното апсење во зградата на општина Врапчиште, вели дека се изолирани инциденти кои што ќе следат и понатаму.
-Владиката и жителите на селото се оградуваат од ваквите инциденти. Она што е интересно е дека на социјалните мрежи, излегоа слики на едно од лицата и се гледа во друштво на политички активни ликови. Ако се земе во предвид политичката поддршка на градоначалникот во општина Врапчиште, но и се уште полициската структура во ОВР Гостивар, тогаш лесно ќе се дојде до заклучокот дека ова е дел од фолклорот што се подготвува за сеење етничка и верска нетрпеливост и обид за дестабилизација. Не можеме како Влада, имајќи ги во предвид последните измени во Законот за полиција и работа на МВР, да се случат промените во раководните структури, бидејќи се лимитирани на 5 години искуство на висока полиција. Вие знаете седум години кои беа кај нас во Влада…Ќе мора во следните 2-3 месеци да се случи измена на Законот, за да дојде до измена на раководните структури, за да можеме реално да ја контролираме ситуацијата, рече Мицкоски на прес-конференција во Владата.
Тој е дециден дека „не треба да се има дилема дека корумпираните политички елити од минатото, ќе се обидат преку центрите на влијание во секакви институции, да создаваат етнички конфликти и тензии“.
-Ние ја контролираме ситуацијата, брзо се реши и ова. Самите жители на село Галате го отфрлија сето ова, како и владиката на Гостиварско-полошката епархија. Мораме да одиме напред и да се бориме да одиме напред, додаде премиерот.