Фудбалерите на Барселона со победата од 5:2 над најголемиот ривал Реал Мадрид ја освоија рекордната 15. титула во Суперкупот на Шпанија.
Барселона стигна до славјето во саудискиот град Џеда иако Реал веќе поведе во петтата минута со голот на Килијан Мбапе. Но, потоа дојде чудесен одговор од Барса, која постигна четири гола до полувремето.
Зрно надеж за клубот од Реал Мадрид дојде во 57. минута кога голманот на Барса, Војчех Шчесни беше исклучен поради прекршок надвор од шеснаесетникот. Полскиот голман го собори Мбапе и заработи црвен картон. Родриго постигна гол од слободен удар за 2:5, совладувајќи го Ињаки Пена, кој влезе во игра.
Сепак, резултатот не се промени до крајот и Барселона заслужено славеше.
Барселона, барем според шпанскиот весник АС, за оваа победа инкасирала девет милиони евра, додека Реал Мадрид нешто повеќе од седум милиони. Не е лошо за еден ден „работа“…