Кинескиот претседател Си Џинпинг го напушти Кремљ по свечената вечера и разговорите со рускиот претседател Владимир Путин.
Претседателот на Русија излезе да го придружува својот кинески колега до автомобилот. Лидерите се ракуваа и кратко разговараа.
„Сега се случуваат промени кои не се случиле 100 години. Кога сме заедно, ги поттикнуваме тие промени“, рече Си.
Путин се согласи и му посака безбедно патување.
„Чувај се, драг пријателе“, одговорил кинескиот лидер пред да влезе во автомобилот, а Путин неколкупати ја кренал раката во знак на поздрав, пренесе „Спутник“.
Во вторникот во Кремљ се одржаа руско-кинески преговори и гала вечера.
За време на државната посета на кинескиот претседател на Русија, двајцата лидери во понеделникот неформално разговараа повеќе од четири и пол часа, а во вторникот официјалниот дел од посетата на Си Џинпинг на Кремљ траеше шест часа.
Во заедничката изјава на Москва и Пекинг за продлабочување на односите на сеопфатно партнерство и стратешка соработка, објавена на веб-страницата на Кремљ, се наведува дека Русија и Кина повикуваат на прекин на сите чекори кои придонесуваат за зголемување на тензиите и продолжување на борбените операции во Украина.
„Страните повикуваат на прекин на сите потези кои придонесуваат за ескалација на тензиите и продолжување на непријателствата, а апелираат и да се избегне натамошна деградација на кризата до нејзино целосно преминување во неконтролирана фаза. Страните се против сите еднострани санкции, воведени со заобиколување на Советот за безбедност на Обединетите нации“, се нагласува во соопштението.
Во заедничкото соопштение се нагласува дека Русија и Кина имаат намера меѓусебно да се поддржуваат во заштитата на интересите на секој од нив, а пред се суверенитетот, територијалниот интегритет, безбедноста, дека државите се договориле редовно да вршат заеднички патроли на море и во воздух, како и заедничка обука и се изразила голема загриженост за зајакнувањето на врските на НАТО со земјите од азиско-пацифичкиот регион за воени прашања.
Москва и Пекинг го повикаа НАТО да го почитува суверенитетот на другите земји и нивните интереси.
Во соопштението се истакнува дека Русија го потврдува почитувањето на принципот „една Кина“ и признава дека Тајван е составен дел на Кина и се вели дека двете земји ќе ја зголемат соработката во борбата против „шарените револуции“, „силите на злото“, вклучувајќи го и исламското движење Источен Туркестан.
Се наведува и дека нуклеарните држави не смеат да го распоредуваат своето нуклеарно оружје надвор од границите на нивната територија и треба да го повлечат целото нуклеарно оружје распоредено во странство и се посочува дека во нуклеарна војна не може да има победник и никогаш не смее да биде започната таква.
Апелира до САД и Јапонија да го забрзаат и прекинат ликвидирањето на хемиското оружје и се наведува дека Москва и Пекинг се посветени на започнување преговори за создавање на меѓународен договор за спречување на распоредувањето на оружје во вселената што е можно поскоро.
„Русија и Кина го осудуваат тероризмот и практиката на мешање во внатрешните работи под изговор дека се борат против него, а исто така ја застапуваат идејата за формирање единствен глобален антитерористички фронт со централна улога на Обединетите нации“, се додава во соопштението.
Загриженост се изразува и за воено-биолошката активност на САД, вклучително и надвор од границите на земјата и бараат објаснување, а се наведува дека Москва и Пекинг се залагаат за објективна истрага за експлозиите на гасоводите „Северен тек“.
Забележано е и дека Русија и Кина се противат на политиката на сила, на начинот на размислување на „Студена војна“ и на конфронтацијата на блокот, пренесе Танјуг.
Во рамки на државната посета на кинескиот претседател на Русија беа потпишани голем број меѓувладини, меѓуресорски и корпоративни документи за развој на руско-кинеската соработка во различни области.
Кинескиот лидер пристигна во државна посета на Русија на 20 март и тоа е негово прво патување во странство откако по трет пат е избран за шеф на државата.