Според Ројтерс, цитирајќи два извори, Зеленски планира да отпатува во Вашингтон во петок за да се сретне со Трамп. Украина наводно ги договорила условите со САД за клучниот договор за минерали, барем така изјави за „Скај њуз“ (Sky News) извор од украинската влада.
Овој договор, откако ќе биде потпишан, може да го отпочне новото долгорочно партнерство меѓу Киев и Белата куќа по напнатата ситуација што доминираше во последните денови.
САД се откажуваат од барањето на 500 милијарди долари
Договорот предвидува формирање нов фонд кој ќе инвестира во украински ретки минерали и други природни ресурси. Клучна промена од претходните предлози е тоа што документот повеќе не го содржи барањето на САД за правото на 500 милијарди американски долари потенцијални приходи од овие ресурси, што Зеленски претходно го опиша како несериозна понуда.
Нова економска основа за односите меѓу Киев и Вашингтон
Иако не ги вклучува безбедносните гаранции што Украина ги посакуваше, договорот може да отвори долгорочна соработка меѓу Киев и администрацијата на Трамп по неколкунеделни напнати преговори.
Украинските власти го гледаат договорот како важен чекор во продлабочувањето на економските и стратешките односи со САД, особено во контекст на војната со Русија.
„Очекуваме договорот да биде финализиран и брзо потпишан“, изјави извор од украинската влада.
Зеленски наскоро во Вашингтон?
Украинскиот претседател Володимир Зеленски в петок ќе отпатува за Вашингтон за да се сретне со американскиот претседател Доналд Трамп, потврди извор од украинската влада за „Скај њуз“.
Според истиот извор, датумот на средбата бил предложен од американската страна. Оваа средба доаѓа откако САД и Украина постигнаа договор за клучниот договор за минералните суровини.