Индија забележа нови 94.372 заразени со коронавирус во претходните 24 часа, со што вкупниот број на заразени лица во земјата достигна 4,75 милиони, објави индиското Министерство за здравство.
Исто така, пријавени се 1.114 смртни случаи за еден ден, со што вкупниот број на смртни случаи од коронавирус во земјата се искачи на 78.586.
Додека бројот на заразени во Индија расте побрзо отколку на кое било друго место во светот, бројот на луѓе кои се опоравуваат од вирусот исто така нагло се зголеми. Стапката на опоравување во земјата е 77,77 проценти и скоро 70.000 закрепнати лица се пријавуваат секој ден во текот на септември, изјави Министерството за здравство.
Министерството ја припишува високата стапка на опоравување од „Ковид-19“ на агресивно тестирање и брз надзор, иако експертите проценуваат дека Индија треба да спроведе повеќе тестови со оглед на огромната популација.
Индија стана втора најтешко погодена земја од вирусот во светот по САД и сега тестира повеќе од милион луѓе на ден.
Индискиот парламент треба да продолжи со работа во понеделник со строги физички мерки за дистанцирање. Парламентот ја прекина работата во март непосредно пред воведувањето на општите мерки за изолација во земјата за запирање на пандемијата.
Таа строга изолација предизвика голема економска криза, така што индиската економија имаше пад од скоро 24 проценти во вториот квартал и беше најтешко погодена меѓу водечките светски економии.