Кога Сиа Фурлер се појави на сцената го привлече вниманието на многумина. Освен хитовите кои ги изведуваше и пишуваше за другите, пејачката на многумина им падна во очи и поради нејзиниот уникатен моден стил.
Нејзината уникатна фризура која покрива половина од нејзиното лице веднаш заинтригира многумина, а потоа и деталите од нејзиниот живот.
Инаку, пејачката еднаш откри дека боледува од ретко пореметување наречено Елерс-Данлосов синдром.
„Јас страдам од невролошко пореметување и ужасни болки, станува збор за Елерс-Данлосов синдром. Сакав да ви кажам на сите вас кои чувствувате болка, без разлика дали е физичка или емоционална – ве сакам и продолжете понатаму. Животот е тежок. Болката е деморализирачка, но не сте сами“, напиша таа на Твитер.
Подоцна пејачката уште еднаш се огласи и дополнително објасни за што се работи.
„Само да појаснам, имам невролошко нарушување во Елерс-Данлос. Елерс-Данлос не е невролошка болест. Се извинувам поради забуната“, додала Сиа.
Инаку, синдромот Елерс-Данлос е многу ретка наследна болест на сврзното ткиво која обично води до невообичаено свитливи (флексибилни) зглобови, многу еластична кршливост на кожата и ткивото. Се произведуваат неисправни колагенски влакна, а самото ниво на производство е намалено. Колагенот е протеин кој дава цврстина на кожата и лигаментите и ги прави отпорни на истегнување. Поради овие дефекти, кожата и зглобовите се претерано растегливи (хиперекстензија), раните тешко зараснуваат (во процесот на заздравување на раните неопходна е контракција на нивните рабови), кожата е многу чувствителна и лесно се повредува. Се јавуваат и нарушувања на внатрешните органи: срцето, крвните садови, цревата, како и големи зглобови.
Потсетуваме, покрај тоа што и самата испеа бројни хитови, Сиа напиша и над 100 песни за ѕвезди како Бијонсе, Адел, Бритни Спирс, Ријана и други.