Најголемата тајна армија во светот, списанието „Њузвик“ ја нарече армијата, која брои околу 60.000 припадници, чии задачи вклучуваат активности против исламисти во Африка и Пакистан и тајни операции во Иран и Северна Кореја.
Околу 60.000 луѓе се ангажирани во операцијата на Пентагон, која магазинот ја опишува како најголема тајна операција во историјата. Таа армија е десет пати поголема од слични операции што некогаш биле иницирани од Централната разузнавачка агенција, ЦИА.
Списанието тврди дека оваа армија спроведува активности во САД, но и надвор од границите на таа земја, во униформи и цивилна облека, понекогаш криејќи се зад приватни компании или консултантски куќи.
По двегодишна истрага, „Њузвик“ тврди дека реалните димензии на оваа операција не можат со сигурност да се проценат и дека целиот потфат е во спротивност со американските закони и Женевската конвенција.
Во оваа операција се вклучени околу 130 приватни компании, кои се обезбедуваат со логистичка поддршка од десетици малку познати и тајни владини служби, по цена што надминува 900 милиони долари годишно.
Според американското списание, тие пари се трошат на создавање лажни идентитети и набавка на опрема за шпионирање.
Околу 30.000 припадници на оваа тајна армија се ангажирани во специјални операции, кои вклучуваат гонења на исламистите од Пакистан до Западна Африка, но и во акции од Иран до Северна Кореја.
Сè поголем број луѓе ангажирани на овој начин се занимаваат со електронска војна и никогаш не се оддалечуваат од тастатурите. Нивната главна цел е да се спротивстават на растечката конкуренција што Кина и Русија ја претставуваат во Америка.