Вчера Европската унија постигна конечен договор за законот со кој се забранува продажба на нови автомобили на бензин и дизел од 2035 година. Целта на законот е борба против климатските промени и побрза транзиција кон електрични возила.
Преговарачите од земјите на ЕУ, Европскиот парламент и Европската комисија, кои подготвуваат нови закони, се согласија дека производителите на автомобили мора да постигнат нула емисија на CO2 до 2035 година, што, според AutoKlub, ќе ја спречи продажбата на нови возила со фосилни горива во 27 земји.
„Овој договор е добра вест за возачите на автомобили. Новите возила со нулта емисија ќе станат поевтини, што ќе ги направи попристапни и достапни за секого“ – смета главниот преговарач на Парламентот, Јан Хуитема.
Постигнат е договор за намалување на емисиите на CO2 од новите автомобили за 55% до 2030 година, а до 2035 година треба да се постигне нула емисија.
Како што регулаторите го зголемуваат притисокот врз производителите на автомобили да ги намалат емисиите, многумина најавија инвестиции во електрификација. Шефот на VW, Томас Шефер, изјави дека од 2033 година, марката ќе произведува само електрични автомобили во Европа.
Според Ројтерс, законот наиде на значителен отпор кога беше предложен во 2021 година, а европската асоцијација на производители на автомобили ACEA предупреди на забрана на одредена технологија и сугерираше дека моторите со внатрешно согорување и возилата со водород ќе бидат важен запчаник во транзицијата кон ниски емисии.
Да потсетиме, пред неколку дена беше објавена анализа која јасно укажува дека овие планови тешко ќе се остварат. Накратко, транзицијата кон електрични возила оди катастрофално погрешно од три причини: недостаток на делови, високи цени и слаба инфраструктура.