Украинскиот претседател Володимир Зеленски изјави дека украинските сили заробиле двајца кинески државјани кои, како што рече, учествувале во борбени операции на страната на руската армија.
Според него, заробувањето се случило во регионот на Доњецк, а кај уапсените биле пронајдени документи за идентификација, банкарски картички и лични податоци.
„Нашата војска зароби двајца кинески државјани кои се бореле како дел од руската армија на територијата на Доњецк. Пронајдени се документи на овие затвореници, банкарски картички, лични податоци“, рече Зеленски во објавата на „Телеграм“, која ја придружуваше со видео од еден од заробените мажи.
Our military has captured two Chinese citizens who were fighting as part of the Russian army. This happened on Ukrainian territory—in the Donetsk region. Identification documents, bank cards, and personal data were found in their possession.
We have information suggesting that… pic.twitter.com/ekBr6hCkQL
— Volodymyr Zelenskyy / Володимир Зеленський (@ZelenskyyUa) April 8, 2025
Зеленски тврди дека разузнавачките служби имаат информации кои укажуваат дека во руските единици има значително поголем број кинески граѓани од само овие двајца. Тој додаде дека сите факти се проверуваат, а истрагата ги вклучува разузнавачката служба, Службата за безбедност на Украина (СБУ) и вооружените сили на Украина.
Украинскиот претседател истакна дека му наложил на украинскиот министер за надворешни работи веднаш да стапи во контакт со Пекинг и да побара објаснување како Кина планира да одговори на оваа ситуација.
„Вклучувањето на Кина, директно или индиректно, во оваа војна во Европа е јасен сигнал дека Путин нема намера да ја заврши војната. Тој бара начини да ја продолжи. Ова дефинитивно бара одговор. Одговор од САД, Европа и сите оние во светот кои сакаат мир“, рече Зеленски.
Заробените кинески државјани моментално се под јурисдикција на Службата за безбедност на Украина, а во тек се оперативни и истражни дејствија.