Манчестер Сити се пласираше во финалето на ФА Купот по тесната победа од 1:0 против Челси. Решавачкиот гол го постигна Бернардо Силва во 84. минута, а не му беше лесно на неговиот истоименик во редовите на лондонскиот клуб, 39-годишниот Тиаго Силва.
Тоа го потврдија и сцените на крајот од натпреварот кога Бразилецот беше фатен како плаче, а неговиот соиграч Нони Мадуке се погрижи работата да добие трагикомичен и ироничен тон.
Имено, додека Силва погоден од поразот си ги бришеше солзите од лицето, во позадина плачеше и Мадуке, но не од среќа, туку од смеа. Напаѓачот на Челси, очигледно, не беше толку погоден од поразот како Силва, а „утеха“ најде забавувајќи се со Џек Грилиш, играч на победничката екипа.
Со овој пораз, Челси и математички испадна од борбата за трофеи оваа сезона, додека Сити направи голем чекор кон освојување на најстарото фудбалско натпреварување. И покрај неодамнешниот пораз од Реал на пенали, тимот на Пеп Гвардиола е во одлична форма, а доказ за тоа е фактот дека тие се непоразени во последните 29 натпревари во сите натпреварувања.
До крајот на сезоната ќе се борат за четвртата последователна титула на англискиот шампион, додека триумф ќе бараат во финалето на ФА Купот против подобриот од дуелот помеѓу Ковентри и Манчестер Јунајтед.