Американската актерка Дерил Хана ја изрази својата поддршка за Украина кога излезе на сцената на Оскарите. 64-годишната актерка излезе на сцената во театарот Долби за да ја додели наградата за категоријата „Достигнувања во филмската монтажа“.
„Слава на Украина“, рече актерката, кревајќи два прста во знак на мир, а нејзината кратка порака ги воодушеви присутните, која беше придружена со овации.
Ова не е првпат Дерил Хана да ја поддржува Украина. Набргу откако Русија ја започна својата инвазија на Украина во 2022 година, таа напиша: „Ние стоиме со вас и со сите жртви на бруталните диктатори и бесмислените војни“.
Инаку, кратката, но значајна порака пристигна неколку дена по конфликтот меѓу американскиот претседател Трамп и украинскиот претседател Зеленски во Белата куќа.
За време на тензичниот состанок во Овалната соба во петокот, Трамп му рече на Зеленски дека „не е подготвен за мир“ откако Зеленски ги предизвика него и потпретседателот Венс поради историјата на игнорирање на договорите за прекин на огнот со рускиот претседател Владимир Путин.