Англиски Манчестер Сити го објави трансферот на шпанскиот играч за врска Нико Гонзалес од португалскиот Порто на четири и пол годишен договор.
Сити плати 60 милиони евра за 23-годишниот играч, изјави извор од клубот, цитиран од Ројтерс.
Гонзалес е производ на младинската академија на Барселона. Тој забележа 37 настапи за каталонскиот гигант пред да се пресели во Порто во 2023 година. Играчот од средниот ред за Порто одигра 68 натпревари, постигна 9 гола и имаше 9 асистенции. Беше дел и од шпанската репрезентација до 21 година.
„Трансферот беше тешко да се направи бидејќи настапите на Нико беа исклучителни и тој беше многу важен дел од перформансите на Порто оваа сезона“, изјави директорот за фудбал на Манчестер Сити, Чики Бегиристајн.
„Навистина сме среќни што успеавме да ја завршиме зделката пред крајот на преодниот рок“, додаде тој.
A message from Nico! 🩵👋 pic.twitter.com/VDbeFgJ1wG
— Manchester City (@ManCity) February 3, 2025
Гонзалес стана четвртото засилување на Сити во јануарскиот преоден рок по доаѓањето на Абдукодир Хусанов и Витор Реиш, плус египетскиот напаѓач Омар Мармуш.
Шампионот на Премиер лигата, кој го загуби добитникот на Златната топка Родри поради повреда во септември, моментално се наоѓа на петтото место во англиската прва лига.