Разговорите на премиерот Зоран Заев со лидерот на БЕСА Билал Касами не биле за влез на оваа партија во влада, а не се преговара ниту со ДПА, тврди владиниот портпарол Миле Бошњаковски.
– Средбата беше во насока на добивање поддршка во Собранието за реформските процеси. Не беше на ниво за влегување во Влада – рече Бошњаковски додавајќи дека БЕСА ветила оти ќе ги поддржи реформските закони.
– Ќе го цитирам премиерот Заев: Со ДПА не се во разговори.
Бошњаковски исто така рече и дека Владата има стабилност.
Дали ќе се назначува нов министер без ресор, на местото на Рамиз Мерко кој стана градоначалник на Струга и дали и кој ќе го пополни местото потпретседател на владата задолжен за реформи, коешто место и беше понудено на Алијансата за Албанците, засега нема конкретни решенија, посочија од Владата.