Продолжуваат средбите на работните групи на СДСМ и на ВМРО – ДПМНЕ со цел да се постигне компромис за гласање на законите кои бараат двотретинско мнозинство во Собранието. Разговорите се водат далеку од очите на јавноста. Иако ниту една страна не дава детали за тоа до каде се разговорите, се дознава дека освен за планот 3 – 6 – 9 се разговара и за Законот за јазиците и за Законот за заштита на сведоците.
Контактирани од Алсат М, од ВМРО – ДПМНЕ велат дека поради чувствителноста на разговорите не можат да дадат детали за средбите со СДСМ, за тоа за кои закони досега се договориле и за кои се уште не нашле заеднички јазик.
Најголемата опозициска партија вели дека враќањето во Собранието, по бојкотот поради апсењето на нивни пратеници обвинети за настаните од 27 април, зависи токму од овие разговори.
И функционери од СДСМ кои се дел од работната група, не сакаат да дадат информации за тоа дали е постигнат некој договор со ВМРО – ДПМНЕ. Бидејќи немаат доволно пратеници за гласање на системските закони, СДСМ бара помош од ВМРО – ДПМНЕ за да обезбедат мнозинство за усвојување на закони за кои е потребна двотретинско мнозинство. СДСМ изразило подготвеност да ја прошири и владината коалиција со цел да обезбеди стабилно мнозинство.
Од ДУИ негираат дека имало средба на нивни претставници со претставници на ВМРО – ДПМНЕ. Велат дека имаат секојдневни средби со коалициските партнери со цел усогласување на ставовите.