Министерот за внатрешни работи, Оливер Спасовски во вечерашното гостување на ТВ 24 ги отфрли обвинувањата од опозициската ВМРО-ДПМНЕ дека МВР ги штити убиецот и нарачателот на убиството на Мартин Јанушев и додаде дека оние кои го криеле убиството на Мартин Нешкоски немаат никакво право никого да обвинуваат.
„Овие изјави кои ВМРО-ДПМНЕ ги дава со дневнополитички цели сакам да ги отфлам со индигнација. Тоа е една лага што се пласира во јавноста. Сведоци сме дека опозицијата најдобро пласира лажни вести, и тоа не само сега, туку и во моменти кога беше влада. Тие со лага 11 години се одржуваа на власт. Лица што го криеа убиството на Мартин Нешкоски и лица што правеа се да заштитат одредени луѓе што учествуваа во убиството на Нешкоски, немаат никаков кредибилитет да обвинуваат било кого. Тоа е лага и никого немаме намера да штитиме. Секој мора да одговара за своите постапки“, рече Спасовски.
За убиството на Јанушев, Спасовски повтори дека МВР има непобитни докази дека Ф.С. е убиецот на Јанушев.
„МВР мора да се грижи за безбедноста на граѓаните, но за жал, ете се случуваат и вакви настани каков што е овој со убиството на Мартин Јанушев. За овој случај имаме цврсти докази дека Јанушев е убиен од Ф.С. Имаме индиции каде осомничениот се наоѓа, работиме за да го пронајдеме и да го изведеме пред лицето на правдата. Тогаш ќе ги дознаеме и мотивите. Сега се анализираат сите докази, се вештачат мобилните телефони, а на местото на убиството е пронајден и пиштол за кој се испостави дека пиштолот е од извршено кривично дела. Тоа оружје не е на таткото на Јанушев или на било кој член на неговото семејство. Овој пиштол убиениот го имал во него подолго време и со него била извршна кражба“, рече во интервјуто за телевизијата министерот Спасовски.
Министерот Спасовски додаде дека оружјето со кое е убиен Јанушев не е најдено, а за тоа дали МВР има одговорност за бегството на убиецот, појасни дека МВР има постапено во согласнот со сите законски процедури веднаш по убиството и сите постапки се преземени од страна на полицијата.
„Во периодот по убиството нема пропусти од наша страна во врска со преземање на сите мерки, обезбедување на местото и прибирање на доказите. По убиството осомничениот се оддалечува од место. Се преземаат сите мерки за негово пронаоѓање. Случајот е во фаза на истрага и ќе треба да се испита и дали тој бил сам или некој му помагал. Откако ќе биде пронајден ќе можеме да го склопиме целиот тој мозаик“, изјави Спасовски.
Околу откривање на убиството ќе помогнат и вештачењата на мобилните телефони, рече Спасовски и додаде дека од овие податоци веќе се добиваат информации.
За убиството на Дилевер Бојку, кое е исто така нерасчистено, министерот Спасовски изјави дека во јавноста ќе излезат кога ќе го потврдат она што сметаат дека е крунски доказ во расветлување на убиството.