Само неколку часа по разорниот земјотрес што го погоди Мјанмар, воената хунта која владее со земјата изврши воздушни напади врз неколку населени области на западот од земјата, јавуваат локалните извори.
Бројот на жртвите од земјотресот продолжува да расте и, како што пренесува NBC News, може да надмине 10.000. Армијата ги нападна бунтовниците во земјата која веќе е растурена од крвавата граѓанска војна.
Воената хунта, предводена од генералот Мин Аунг Хлаинг, ја презеде власта во Мјанмар во февруари 2021 година, соборувајќи ја демократски избраната влада на Националната лига за демократија и нејзиниот лидер Аунг Сан Су Чи. Пучот доведе до масовни протести и широка граѓанска непослушност, која властите брутално ја потиснаа со сила.
Во месеците што следуваа, низ целата земја избувнаа вооружени судири меѓу армијата и различни етнички и продемократски бунтовнички групи, вклучително и членови на медицинскиот и образовниот персонал кои се приклучија на отпорот. Во најтешко погодените области – главно во западниот дел на земјата, во близина на границата со Тајланд – ситуацијата е очајна. Покрај разорните последици од земјотресот, кој опустоши цели села и градови, цивилите неколку часа подоцна се најдоа под ударите на воздушните бомби од сопствената армија.
„Тешко е да се согледа психолошкиот и емоционалниот шок во кој се наоѓаат жителите на најсиромашната земја во Азија, која штотуку го доживеа најразорниот земјотрес во својата историја, за да биде бомбардирана неколку часа подоцна“, пишуваат извори од теренот. Бројни бунтовници и етнички милиции кои контролираат делови од територијата на западниот дел на земјата сè уште се во директен вооружен конфликт со лојалистите на воената хунта. Во некои области, каде што практично повеќе не функционира централната власт, токму овие милиции се обидуваат да организираат евакуација и лекување на повредените, како и да отворат канали за хуманитарна помош.
Како што тврдат нивните претставници, постои страв дека меѓународните донации – доколку се канализираат преку режимот – би можеле да бидат злоупотребени, па дури и искористени за финансирање на понатамошни воени операции. Мјанмар со години е во состојба на длабока политичка, хуманитарна и економска криза. По државниот удар во 2021 година, земјата е целосно изолирана, санкционирана од Западот и зависи од поддршката што ја даваат Русија и Кина. И покрај меѓународните апели, воената хунта останува на власт.
Земјотресот и последователните воздушни напади само ја продлабочија кризата, а аналитичарите предупредуваат дека Мјанмар може да влезе во фаза на целосна дестабилизација во следните недели, без јасна власт и со милиони луѓе во опасност по нивните животи.
Three Places Got Hit Hard by an Earthquake and then the Military Started Bombing
March 28, 2025
The video’s got footage of a military plane bombing Nawnghkio Township right after a huge earthquake shook things up
📹: people’s Spring #Myanmar #Nawnghkio#WhatsHappeningInMyanmar pic.twitter.com/qO6qStnnBs— 🎀 𝑾𝒉𝒊𝒔𝒌𝒆𝒚 𝑵𝒆𝒂𝒕 🎀 (@WhiskeyNeat_ko) March 29, 2025