Илон Маск официјално го заврши својот мандат во администрацијата на американскиот претседател Доналд Трамп. Денеска, во Овалната соба, Маск и Трамп заеднички одржаа прес-конференција со која се означи крајот на неговата официјална функција. Белата куќа во четвртокот му се заблагодари на Маск за неговата служба, по што Трамп ја отвори церемонијата на збогување со видео клип од CNBC во кој уредникот Рик Сантели ја пофали администрацијата за намалувањето на трговскиот дефицит во изминатиот месец. Во своето обраќање, Трамп истакна дека Маск работел „неуморно“ како дел од неговата администрација и дека водел тим кој спровел „најзначајни реформи со генерации“. Според него, Маск значително го променил начинот на кој функционира Вашингтон.
„Ќе ве паметиме“, рече Трамп, нагласувајќи дека токму под водство на Маск се елиминирани „измами, злоупотреби и владините договори вредни милијарди долари“. Тој додаде дека сака намалувањата направени од одделот за оптимизација на владините трошоци, кој го водеше Маск, да останат трајни. Според претседателот, многу од луѓето што работеа со Маск ќе продолжат со работа во владата. „Елон навистина не си заминува. Тој ќе доаѓа и ќе си оди. Барем така мислам. Имам чувство. DOGE е негово бебе“, рече Трамп, алудирајќи на проектот што Маск го водеше. „Начинот на кој Елон ѝ служеше на Америка е без преседан во модерната историја“, заклучи Трамп.
Маск, пак, во своето кратко обраќање порача дека ќе продолжи да влијае врз политиките на Белата куќа. „Ова не е крај на DOGE, ова е всушност почеток. DOGE ќе стане посилен. Сигурен сум дека на крајот ќе видиме заштеди од трилион долари“, рече тој. Тој додаде дека неговиот тим ќе продолжи со работа, а тој ќе остане близок пријател и советник на претседателот. На самиот крај од церемонијата, Трамп му подари на Маск симболичен подарок за збогум – златен клуч од Белата куќа, сместен во украсна кутија. Церемонијата заврши со аплауз од присутните, а многумина ја опишаа оваа разделба како „политичка, но не и лична“.