Граничниот премин „Евзони“ на грчката страна од границата е затворен поради пожар.
Судејќи по видеата објавени на Фејсбук-групата „Grcka info“, може да се забележи дека пожарот е во непосредна близина на граничниот премин.
Грчкиот медиум „Прототема“ пишува дека пожарот избувнал нешто по 12 часот на тревнат површина. На гаснење работат 22 пожарникари и 10 возила.
„Поради пожарот затворен е патот кон граничниот премин Евзони додека сообраќајната полиција го пренасочува сообраќајот“, пишува „Прототема“.
Граѓаните кои се упатуваат кон граничниот премин, јавуваат дека истиот е привремено затворен.
Се уште не е познато како настанал пожарот, но се претпоставува дека се работи за шумски пожар со оглед на големите горештини кои деновиве ја зафатија Македонија и Грција.
Φωτιά στα σύνορα των Ευζώνων- Έκλεισε το τελωνείο https://t.co/p1FvZuOOxg pic.twitter.com/5gBjdZ2HWA
— Makeleio.gr (@Makeleio_gr) July 17, 2024
Како што велат сведоци од македонската страна на границата, струјата на „Богородица/Евзони“ е исклучена, а вработените се евакуирани.
Запрен е сообраќајот, поради што има гужви и од македонска страна. Во моментов колоната е до Гевгелија. Возилата се пренасочуваат на граничниот премин Дојран.
Во меѓувреме, стигна соопштение и од нашето МВР дека во моментов е во прекин сообраќајот преку ГП „Богородица“. Оттаму велат дека се преземаат интензивни мерки за гасење на пожарот и по неговото гасење, повторно ќе биде овозможено преминување преку граничниот премин.
-Апелираме до граѓаните да не се упатуваат кон граничниот премин додека не биде објавено дека пожарот е изгаснат и сообраќајот нормализиран, порачаа од МВР.