Во скопската Градска општа болница „8 Септември“ е изведена првата микробранова аблација (MWA) на тироидна жлезда во Македонија. Интервенцијата ја реализираше тимот од одделението за интервентна радиологија, под надзор и стручна поддршка на проф. Булент Чекич од Анталија, Турција – врвен експерт во оваа област.
Според директорот на Фондот за здравствено осигурување на Македонија, Сашо Клековски, оваа медицинска иновација претставува голем чекор напред во третманот на тироидни заболувања – состојби кои се многу чести во нашата земја. Тој објасни дека на самите интервенции им претходеле работилница и обука за медицинскиот персонал, што дополнително ја зголемува вредноста на овој успех.
Микробрановата аблација е современа, минимално инвазивна процедура со повеќе придобивки за пациентите:
-
Без хируршки рез: Не се користи општа анестезија и нема лузни.
-
Брзо закрепнување: Се изведува амбулантски, а пациентите си заминуваат дома по само неколку часа.
-
Зачувување на тироидната функција: Се отстранува само заболениот дел, додека здравото ткиво останува недопрено – со што се намалува ризикот од потреба за доживотна хормонска терапија.
Оваа метода, заедно со етанолската аблација, ќе биде дел од новиот пристап кон лекување на тироидни нодули во ГОБ „8 Септември“. Воведувањето на вакви напредни технологии ќе придонесе за поквалитетна здравствена услуга и подобар живот за пациентите во Македонија.
Клековски упати искрени честитки до медицинскиот тим за успешно реализираната интервенција и за нивната посветеност кон модернизација на македонското здравство.
