Милош Биковиќ започна со снимање на филмот „Црвена свила“, кој е руско-кинеска копродукција. Најпопуларниот српски актер глуми руски таен агент кој е фатен во Кина во овој трилер.
Главниот лик е поранешен царски шпион (Милош Биковиќ), кој е заглавен во Кина по распадот на Руската империја. Обидувајќи се да се врати во својата родна земја, тој станува придружник на кинеските курири кои треба да достават доверливи документи во Москва. Заедно се качуваат во воз низ Сибир, но со нив се и странски шпиони и безмилосни бандити кои сакаат да ги добијат вредните хартии. Ликот на Биковиќ мора да соработува со советските специјални агенти за да го идентификува нивниот заеднички непријател.
Биковиќ претходно изјави дека со нетрпение ја очекува улогата и дека ќе снима во неколку земји.
– Ќе снимам филм во руско-кинеска копродукција, чие снимање е веќе започнато. Филмот се вика „Црвена свила“ и ќе се снима во Кина и Русија. Играм руски империјален агент кој работи за Комунистичката партија на Русија. Тој се обидува да им помогне на пребеганите Кинези од Комунистичката партија на Кина и да им ги спаси животите бидејќи сакаат да ги елиминираат – изјави Милош за српските медиуми.
Режисер на филмот „Црвена свила“ е Андреј Волгин, а покрај Милош, во главните улоги играат Јарослав Могилников, Дмитриј Куличков, Ирина Алферова, Женг Ханџи, Јанг Зихуа и Женг Лонг.