Фотографијата на Кејт Мидлтон опкружена со деца требаше да ја смири јавноста и да ги замолчи теориите на заговор, но изгледа дека го постигна токму спротивното. Теориите на заговор за тоа што и се случува добија нов живот откако големите новински агенции Ројтерс, АФП, Гети Имиџис и АП ја повлекоа фотографијата поради загриженоста дека таа е „манипулирана“ и затоа не ги исполнува нивните уредувачки стандарди.
Тоа требаше да биде специјална фотографија по повод прославата на Денот на мајката во Велика Британија, но и начин да се замолчат злите јазици, но фотографијата на Кејт Мидлтон и нејзините деца многу брзо предизвика контроверзии и прилично голем скандал.
Четирите големи новински агенции – Асошиетед прес, Гети Имиџис, Ројтерс и АФП – ја извадија фотографијата од своите архиви поради загриженоста дека била манипулирана од Кенсингтонската палата.
АП издаде „известување за отстранување“ на клиентите, кажувајќи им на оние кои ја користат нивната услуга дека „при поблиска проверка се чини дека изворот манипулирал со сликата“. Ројтерс соопшти дека ја брише сликата откако ја анализирале. До недела навечер, по британско време, Кенсингтонската палата не го коментираше овој необичен случај.
Принцот и принцезата од Велс ја објавија фотографијата во неделата, посакувајќи им на следбениците среќен Ден на мајката. Очигледно е направена од принцот Вилијам оваа година, барем така стои покрај сликата што ја објавија на своите социјални мрежи. На неа се гледа дека Кејт (42) се смешка опкружена со принцовите Џорџ и Луис и принцезата Шарлот.
Фотографијата требаше не само да го одбележи Денот на мајката, туку и да стави крај на жестоките шпекулации за здравјето на Кејт Мидлтон откако таа исчезна од јавниот живот по абдоминалната операција во јануари.
Но, се случи сосема спротивното – фотографијата само поттикна завери откако корисниците на социјалните мрежи забележаа недостатоци во неа што сугерираат дека е изменета.
Уредниците на фотографии на Ројтерс рекоа дека дел од ракавот на кардиганот на ќерката на Кејт, Шарлот, не бил правилно подреден, што укажува на тоа дека е изменет.
Ројтерс не можеше веднаш да утврди како, зошто или кој ја направил промената.
Водечките фотоагенции кои дистрибуираат фотографии за вести забрануваат објавување на слики кои се претерано уредувани. Прирачникот за новинарство на Ројтерс наведува, на пример, дека алатката за уредување Photoshop може да се користи само во многу ограничени случаи. „Ние користиме само мал дел од неговиот потенцијал за форматирање на нашите слики, нивно сечење и промена на големината и балансирање на тоновите и боите“.
Во соопштението, Ројтерс соопшти дека ја повлекол фотографијата откако ја анализирал. „Го разгледуваме случајот“, рече портпаролот.