Полска и Украина имаат заеднички непријател, но тешко е тоа да се заклучи судејќи само според она што се случува на граничниот премин Дорохуск-Јагодин. Полската страна на границата е блокирана од неколку десетици полски земјоделци, од кои многумина држат црвено-бели знамиња. Тие протестираат поради, како што наведуваат, поплава од украинско жито и други производи по трговската либерализација која ја воведе Европската унија како одговор на руската инвазија, пишува „Политико“.
„Мораме да ја затвориме границата. Зарем треба да гладуваме затоа што тие се во војна?“, прашал Жџислав Дабровски, земјоделец со мало стопанство од 30 хектари, кој се приклучил на демонстрациите.
Демонстрантите пуштаат само два камиона на час во Украина и ниту еден во другата насока. Ова предизвика колона долга 11,5 километри на полска страна, главно украински камиони кои чекаат да се вратат дома.
Ситуацијата е иста на сите патни гранични премини меѓу Полска и Украина, а стресот предизвикан од протестите ги расипува односите меѓу Варшава и Киев. Олександр Кубраков, заменик-премиер и министер за инфраструктура на Украина, во неделата изјави дека 160 тони украинско жито биле незаконски исфрлени од железнички вагони во Полска за време на транспортот до пристаништето Гдањск – четврти таков инцидент.
„До кога полската влада и полицијата ќе дозволуваат да продолжи овој вандализам? Уште еднаш, сите овие земјоделски производи се транспортираат во затворени вагони и одат во други земји. Ние строго го следиме законот. А вие?“, напиша Кубраков на Х.
These pictures show 160 tons of destroyed Ukrainian grain. The grain was in transit to the port of Gdansk and then to other countries.
The fourth case of vandalism at Polish railway stations. The fourth case of impunity and irresponsibility.
How long will the government and… pic.twitter.com/fMVdtBgl3i
— Oleksandr Kubrakov (@OlKubrakov) February 25, 2024
Двете влади требаше да се сретнат минатата среда во Варшава. Во петокот полскиот премиер Доналд Туск одби да се сретне со делегацијата на украинската влада, предводена од премиерот Денис Шмихал, која пристигна на преминот Корчова-Краковец за да се обиде да ја реши кризата. Шмихал им кажал на полските фармери дека украинското жито не е увезено во Полска од септември и дека секое жито што ја минува границата оди во други земји:
„Полјаците и полските фармери мора да ја слушнат оваа вистина за да ја разберат бесмисленоста на блокирањето на границата“, наведе тој.
Украинските земјоделци донеле опрема оштетена од руските мини на преминот за да им покажат на полските фармери во какви услови мораат да работат.