Грчките власти почнаа да собираат стотици илјади мртви риби кои оваа недела го поплавија туристичкото пристаниште во градот Волос.
Минатогодишните поплави ги истераа и речните риби од вообичаените живеалишта во свежите води.
Мртвите риби ја прекриле површината на морето во пристаништето, а непријатната миризба ги вознемирила жителите и локалните власти, кои побрзале да ја отстранат рибата пред смрдеата да стигне до околните ресторани и хотели.
„Смрдеата се чувствува со километри. Не се работи само за брегот, туку и за центарот на заливот Пагасети“, изјави за Ројтерс членот на градскиот совет Стелиос Лимниос.
Во средата, рибарските чамци ги рашириле своите мрежи за да ги соберат рибите, кои потоа биле однесени со камиони. За само 24 часа се собрани повеќе од 40 тони риба, соопштија властите.
Градоначалникот на Волос, Ахилеас Беос, рече дека смрдеата е неподнослива. На прес-конференција тој ја обвини владата која, како што рече, не го решила проблемот пред да стигне до неговиот град.
The Municipality of Volos has temporarily revoked the Blue Flag status from six beaches due to environmental concerns about the presence of dead fish in the Pagasitikos Gulf. This precautionary measure is taken to ensure the safety of swimmers and maintain environmental… pic.twitter.com/Dk1N8YJGaV
— Greek City Times (@greekcitytimes) August 27, 2024
Тој предупреди дека скапаната риба може да предизвика еколошка катастрофа за другите видови во областа. „Тие не го направија она што беше потребно – да постават заштитна мрежа за да ја спречат солената вода да ги убие рибите“, рече тој.
Сопственикот на ресторан на плажа на десетина километри од Волос, Димостенис Бакојани, вели дека летово сообраќајот му е намален за 80 отсто бидејќи помалку туристи сакале да го посетат местото по поплавите.
„Затворањето на бариерата сега не помага. Сега е доцна, туристичката сезона е завршена“, вели тој. Експертите објаснија дека проблемот е предизвикан од историските поплави минатата година кои ја погодија тесалиската рамнина.