Новоизбраниот американски претседател Доналд Трамп синоќа беше триумфално пречекан во Медисон Сквер Гарден во Њујорк, каде присуствуваше на борбата на годината во мешани боречки вештини (УФЦ) меѓу Џон Џонс и Стипе Миочиќ за титулата шампион во тешка категорија.
78-годишниот републиканец се врати во „Медисон Сквер Гарден“, местото каде што одржа контроверзен митинг само две недели пред претседателските избори на 5 ноември. Тогаш еден комичар одржа говор кој подоцна беше осуден како расистички против Порториканците.
Трамп влезе во арената под овации на околу 20.000 гледачи непосредно пред почетокот на борбите додека толпата извикуваше „USA“, „USA“ (САД) и седна точно пред „кафезот “ каде се одржуваа борбите.
Тој пристигна опкружен со неколку негови блиски соработници, вклучувајќи ги милијардерот Илон Маск, Боби Кенеди Џуниор кого го номинираше за секретар за здравство, Тулси Габард назначена за директор на националното разузнавање, Вивек Рамасвами, назначен за ко-шеф со Маск во новото Министерство за Ефикасност на владата. Тука беа и републиканскиот лидер на Претставничкиот дом на САД, Мајк Џонсон и претседателот на организацијата за мешани боречки вештини УФЦ, Дејна Вајт.
Трамп е познат како голем обожавател на ММА спортот и близок пријател на Дејна Вајт, претседател на УФЦ, најпрестижната ММА организација. Дејна Вајт беше поканет од Трамп да му се придружи на сцената во неговиот победнички говор по изборите на 6 ноември.
Главниот меч на вечерта беше борбата за титулата во тешка категорија меѓу Џон Џонс и Стипе Миочиќ. Џон Џонс ја одбрани титулата победувајќи го Миочиќ, а на крајот победата му ја посвети на својот најомилен навивач во првиот ред, Доналд Трамп.
Во триесетте години од своето постоење, ММА се претвори од незадоволство во спортот во политичка сила, истакна Кембел Мекларен, ко-основачот на УФЦ.
Тој смета дека УФЦ и Дејна Вајт и Џо Роган, познатиот коментатор за борбени спортови и водител на многу популарен поткаст во САД, одиграле огромна улога во ширењето на популарноста на Доналд Трамп меѓу младите мажи.
Во својата кариера меѓу шоу-бизнисот и политиката, Доналд Трамп често се појавуваше во присуство на боксери како Мајк Тајсон или кечери како Хулк Хоган.
Популарноста на Трамп е видлива на сите нивоа во боречките вештини, спорт кој врти милијарди долари, пишува „Франс прес“.