Само околу еден процент од Данците биле во контакт со коронавирусот, што значи дека постои можност за втор бран на епидемија, објави во средата агенцијата на Министерството за здравство.
Агенцијата се занимава со контрола на заразни болести, а студијата беше објавена во моментот кога данските парламентарци се согласија за нова фаза на отворање на земјата.
Од 2.500 Данци случајно избрани за студијата, 1.700 досега се согласиле на тестирање за да се утврди присуство на антитела на коронавирусот, велат од агенцијата.
Меѓу нив, само 12 имаа антитела на Сарс-КоВ-2.
Агенцијата потенцира дека ова се првични резултати и дека сè уште е невозможно да се каже дали овие резултати се применливи за вкупното данско население.
Сепак, експертите велат дека резултатите биле загрижувачки бидејќи тие покажале дека Данска може да биде погодена од втор бран на епидемијата.
„На колективно ниво, немаме еластичност и тоа значи дека постои можност повторно да избувне епидемија“, рече Јенс Лундгрен, специјалист за заразни болести во Ригшспитател, една од главните болници во Данска.
Според бројките во средата, Данска забележала 11.315 инфекции и 554 смртни случаи. Партиите во данскиот парламент се согласија во средата за нова фаза на отворање на земјата.
Од 15 април Данска започна со отворање градинки, а децата од пониските одделенија се вратија во училиштата, со строги мерки на физичко растојание и хигиена.
Средните училишта се отворија оваа недела, а музеите, кината и зоолошките градини, меѓу другите, треба да се отворат по зелено светло од парламентот.
Што се однесува до Шведска, една студија открила дека до крајот на април, само 7,3 проценти од жителите на Стокхолм развиле антитела на коронавирусот, зајакнувајќи ги стравувањата дека одлуката на Шведска да не се затвори заради коронавирусот нема да доведе до колективен имунитет толку брзо.
Студијата за антитела се обиде да утврди дали постои потенцијал за колективен имунитет, или дали доволен број од популацијата развила имунитет, што ќе спречи ширење на инфекцијата.
Сепак, концептот на колективен имунитет сè уште не е тестиран во случај на коронавирус и не се знае колку трае имунитетот од инфекција кај закрепнетите пациенти.
Истражувањето е спроведено врз основа на 1,1 илјади тестови од цела Шведска, а објавени се само бројки за главниот град.
Светската здравствена организација ги предупреди државите да не се потпираат на создавање колективен имунитет или „имунитет на стадата“.
Минатата недела објави дека светските истражувања покажале дека антителата се пронајдени во само меѓу 1 и 10 проценти од населението, што се совпаѓа со неодамнешните резултати во Шпанија и Франција.