Средбата на претседателите на државите кои учествуваат во иницијативата „Брдо-Бриони“, која требаше да се одржи во понеделник во Брдо кај Крањ, беше откажана од епидемиолошки причини во регионот, потврдено е официјално во петокот.
Кабинетот на словенечкиот претседател Борут Пахор соопшти дека состанокот е откажан поради епидемиолошки причини и дека учесниците во откажаната средба веќе биле информирани.
„Претседателот Пахор, како домаќин на планираната средба во вакви околности, и покрај голем број на планирани мерки, не може да ги гарантира условите во кои ќе се одвива без ризик од пренесување на инфекцијата“, се појаснува откажувањето на состанокот во Брдо кај Крањ, со надеж дека ќе се подобрат епидемиолошките услови и дека средбата ќе се одржи во блиска иднина, објави Хина.
Сè уште не е познато кога би можел да се одржи самитот за одбележување на 10-годишнината од иницијативата, што ја започнаа Словенија и Хрватска, која има за цел да ги подобри политичките и другите односи и да ја забрза интеграцијата на преостанатите земји во регионот во евроатлантските интеграции.
Иницијативата за редовни годишни состаноци на земји од регионот на различни нивоа беше дадена во 2010 година од тогашните премиери на Словенија и Хрватска, Борут Пахор и Јадранка Косор.
На јубилејниот самит, на кој требаше да присуствуваат Пахор и претседателите на Хрватска, Србија, Босна и Херцеговина, Македонија, Албанија, Црна Гора и Косово, се разговараше за актуелната состојба во регионот, европската перспектива на Западен Балкан и за регионалната политика и предвидени се неколку билатерални средби на учесниците.