Институциите во Приштина издвоија милиони евра за да им помогнат на поранешните лидери на таканаречената Ослободителна војска на Косово, кои се обвинети во Хаг, но официјалните лица не даваат детали за тоа како се трошат парите, пишува „Балкан инсајт“.
Според косовскиот буџет за 2019 година, 1.556.089 евра се потрошени за активности поврзани со специјални обвинителства, но косовското Министерство за правда не достави детали за конкретните активности за кои се потрошени овие пари, наведуваат од веб-страницата.
Оваа година издвоени се 4,15 милиони евра во косовскиот буџет за финансиска поддршка на обвинетите во судските постапки во специјалните судови, но Министерството за правда не достави детали за тоа како се потрошени овие пари, пренесува РТС.
Хашим Тачи досега беше претставен во Хаг од Пјер Ричард Проспер и Џефри Најс.
Откако меѓународните обвинители за воени злосторства во Хаг го сослушуваа косовскиот претседател Хашим Тачи четири дена овој месец, се појави прашањето кој им плаќа на легалните претставници на поранешните лидери на УЧК.
По рочиштето, Тачи не откри детали за сослушувањето, ниту за случаите и обвиненијата што се товарат против него.
Специјалното обвинителство во Хаг поднесе обвинение против Хашим Тачи и Кадри Весели, во кое тие се обвинети за голем број злосторства против човештвото и воени злосторства, вклучително и убиства, присилно исчезнување, прогон и тортура.
Косовскиот претседател, исто така, не откри детали за начинот на финансирање на неговите законски претставници.
Проспер е поранешен обвинител во Меѓународниот кривичен трибунал на Обединетите нации за Руанда и работел како амбасадор на САД за воени злосторства од 2001 до 2005 година.
Тачи го бранеше и британскиот адвокат Џефри Најс.
Ниту канцеларијата на косовскиот претседател, ниту косовското Министерство за правда не дадоа објаснување за тоа кој плаќал за застапување и патни трошоци на Тачи, според „Балкан инсајт“.
Некои политички аналитичари наведуваат дека Тачи имал обврска да ја извести јавноста за капацитетот во кој бил сослушан и кои се специфичните обвиненија против него, но и да одговори на прашањето кој ги плаќал патните трошоци и адвокатот.
Недостатокот на транспарентност во случајот сослушувањето на Тачи е само еден во серија кога станува збор за трошење пари и прашања поврзани со Хашкиот трибунал за воени злосторства, и покрај големите суми вклучени, заклучува текстот.