Според податоците на Монстат, просечната плата без даноци и придонеси во Црна Гора во јуни изнесувала 527 евра, што е за 1,7 проценти повеќе отколку во мај, пренесува РТЦГ.
Просечната нето-плата во јуни е 2,1 процент поголема отколку во истиот месец лани.
Просечната бруто плата во јуни била 787 евра.
„Ако имаме предвид дека потрошувачките цени се зголемија за 0,1 отсто во јуни во однос на мај, следи дека реалните нето-плати се зголемиле за 1,6 отсто во истиот период“, се вели во соопштението.
Монстат објасни дека зголемувањето на просечната плата условува еднократно враќање, односно исплата на сумата со која е намалена платата во 2018 година, во согласност со Законот за плати на вработените во јавниот сектор.
Просечна заработка без даноци и придонеси во јуни, во однос на мај, се зголеми во секторите јавна администрација и одбрана 6,1 отсто, образование 4,9 проценти, градежништво 2,3 проценти, уметност, забава и рекреација два проценти, земјоделство, шумарство и риболов 1,6 проценти, транспорт и складирање еден процент, административни и услужни активности за поддршка, потоа стручни, научни и технички активности и услуги за сместување и храна од по 0,9 проценти, трговија на големо и мало 0,8 проценти, бизнис на недвижнини 0,6 проценти, рударство и вадење камен 0,3 проценти.
Пад е забележан во секторите на други услужни активности за 4,2 проценти, финансиски и осигурителни активности за 3,9 проценти, снабдување со електрична енергија за 2,2 проценти, информации и комуникации за 1,1 процент, снабдување со вода и управување со отпад за еден процент, здравствена и социјална заштита 0,3 проценти и преработувачката индустрија 0,2 проценти.