Напаѓачот на џамиите во Крајстчрч, Брентон Тарант, е осуден денес на доживотен затвор, без можност за условно пуштање поради убиствата на 51 муслимански верник во 2019 година во Нов Зеланд, пренесува АФП.
Судијата Камерон Мандер соопштила дека зад „изопачената“ идеологија на Тарант се наоѓа „силна омраза“ што го натерало да ги нападне мажите, жените и децата кои не можеле да се одбранат.
„Задачата на судот е решително да го потисне ова зло од омраза“, изјавил Мандер, наметнувајќи ја казната, прва од ваков вид во судската пракса во Нов Зеланд.
Истакнувајќи дека муслиманската заедница во Нов Зеланд платила висока цена, тој рече дека сторителот на ужасниот масакр сепак не успеал да ја промовира идеологијата на екстремната десница.
„Бевте суров и безмилосен. Вашиот чин беше нехуман “, рекол судијата.
Незапаметено во историјата
На 15 март 2019 година, австралискиот бел расист Брентон Тарант ладнокрвно уби 51 верник во две џамии во градот Крајстчрч во Нов Зеланд, за време на петочната молитва, предизвикувајќи бран осуда ширум светот.
Тој беше прогласен за виновен за 51 убиство, 40 обиди за убиства и терористички напад, откако се изјасни за виновен во март.
Главниот обвинител Марк Зарифех оценил дека ваквиот масакр „не се памети во историјата на злосторствата во Нов Зеланд“.
„Ова е несомнено најлошото убиство во Нов Зеланд, мотивирано од цврсто вкоренета расистичка и ксенофобична идеологија“, рекол тој.
Доживотен затвор е „единствената соодветна казна“ за Тарант, заклучил Зарифех.