Српскиот претседател Александар Вучиќ патува за Вашингтон во среда, на 2 септември, каде што ќе се состане со претставниците на Косово во Белата куќа два дена подоцна. Српските медиуми го објавија составот на српската делегација за таа средба.
Според Танјуг, во делегацијата што ќе учествува на разговорите со официјалните лица од Приштина, со претставникот на Белата куќа, Ричард Гренел, покрај српскиот претседател Вучиќ, се вклучени и Марко Ѓуриќ, директор на Канцеларијата за Косово и Метохија, Синиша Мали, министер за финансии и Марко Чадеш, претседател на Стопанската комора.
Како што претходно најави претседателот Вучиќ, српската делегација ќе има и одделни средби со Ричард Гренел, како и со советниците во Белата куќа, Роберт О’Брајан и Џеред Кушнер.
Во врска со темата на претстојната средба, претседателот на Србија рекол дека ја знае агендата за тој состанок и дека само една точка е проблематична, но дека неговото искуство му кажува дека нема да запре тука, и дека очекува изненадувања, бидејќи, како што објасни, „единствената тема кога станува збор за Косово, и во САД и насекаде, е взаемното признавање на Белград и Приштина“.
Белград најсериозно се подготвува за состанокот во Белата куќа, а претседателот потенцирал дека не претерува кога вели дека е десетпати повеќе подготвен од Приштина.
„Работиме секој ден, се подготвуваме цел ден“, истакнал претседателот и додал:
„Што и да каже некој и мисли, ние ќе бидеме подготвени за сите опции. Ние го познаваме секое село и секој договор, за разлика од оние што доаѓаат, а не знаат кои договори сме ги потпишале. Но, јас никогаш не ги потценувам“, изјавил Вучиќ.