Во четврток на маса се само економски прашања, но јас се согласувам со изјавата на српскиот претседател Александар Вучиќ дека никој не знае за кои прашања ќе се разговара во петок и што ќе се случи во понеделник, изјави специјалниот претставник на американскиот претседател за дијалог меѓу Белград и Приштина, Ричард Гренел во разговор преку Интернет со група новинари од албанските медиуми, „Вашингтон пост“ и агенцијата „Танјуг“.
Тој така одговори на прашањето дали една од темите на претстојниот состанок на делегациите на Белград и Приштина ќе биде меѓусебното признавање.
– Ова е еден од проблемите со кои постојано се соочуваме – дека јавноста и политичарите гледаат на овој процес само еднострано – рече Гренел.
– Ќе видиме што ќе се случи во петок, што ќе се случи во понеделник – додаде американскиот официјален претставник и посочи дека процесот е прашање на креативност, а не на наука.
На прашањето дали на делегациите може да им се понуди договор сличен на оној постигнат меѓу Израел и ОАЕ, Гренел рече дека не може да одговори на тоа прашање.
– Затоа што, секое прашање ќе се дискутира и од страните зависи дали имаат желба да разговараат за сите прашања – вели Гренел.
САД, како што наведува, немаат таен план, немаат што да бараат.
Единствено што ќе бараат е доколку страните сакаат американска помош, ако сакаат американски долари, тогаш е потребен економски напредок.
– Не сакаме да ги трошиме нашите пари и да „тапкаме“ во место – рече тој.
Како што нагласи, последната година администрацијата на американскиот претседател Доналд Трамп се фокусирала на економски теми, развој и вели дека досега тие имале очигледен успех, повикувајќи се на воспоставување на директен лет меѓу Белград и Приштина, што покрај договорот за изградба на пругата и автопатот, го нарекува историско достигнување.