Србија нема да загрози никого и ќе соработува со сите, колку што е можно денес, рече претседателот на Србија, Александар Вучиќ на промоцијата на најмладите офицери. Српската армија ќе ја зачува и заштити воената неутралност на Србија, но не на хартија, туку вистинска воена неутралност, посочи Вучиќ.
На промоцијата на најмладите офицери, Александар Вучиќ истакна дека Србија мора да има силна армија во светот полн со несигурност, предизвици и непредвидливост.
„Не е ваша и наша работа да работиме за било кој друг освен за нашата земја“, истакна претседателот, посочувајќи дека ќе има многу повици, „од сите страни, добронамерни и лошонамерни“, кои ќе сакаат да не стават на друга страна, велејќи дека тоа е најдобро за Србија.
„За нас постои само една страна, татковината Србија“, рече Вучиќ.
„Вие сте тука за да ги зачувате интересите на нашата земја во мир. Ако некој се обиде да изврши агресија против нашата земја на кој било начин, тоа никогаш нема да биде успешно, затоа што ве имаме вас“, рече Вучиќ.
Тој нагласува дека ќе ги задржи пријателствата и ќе гледа да се справи со сите притисоци со кои треба да се справи релативно малата земја.
„Но, ве молам никогаш да не попуштате и секој агресор да го одвратите од наша територија со вашата сила и одлучност, знаење и верба во својата татковина“, потенцираше Вучиќ и рече дека ќе го „одвратиме секој што ќе се осмели да и го стори тоа на Србија“.
Додава дека Србија нема да загрози никого и дека ќе соработува со сите, колку што е можно денес, бидејќи во светот повторно владее доктрината – ако не сте со нас, тогаш сте против нас.
Претседателот на Србија нагласува дека „љубоморно ќе ја чуваме нашата воена неутралност“.