Две лица беа избодени денеска во близина на поранешните канцеларии на сатиричното списание „Шарли Ебдо“, а полицијата уапси двајца осомничени за нападот.
Според неименуван полициски извор, една жртва е сериозно повредена, но не е во критична состојба. Тоа се вработени во една производна компанија.
Францускиот премиер Жан Кастекс претходно изјави дека четири лица се повредени, а неименувани извори наведоа дека две од четирите лица се во критична состојба.
Attaque à l'arme blanche près des anciens locaux de Charlie Hebdo: le maire du 11e arrondissement invite les habitants du quartier à "rester chez eux" pic.twitter.com/tIFyRINy0W
— BFMTV (@BFMTV) September 25, 2020
Уапсени се двајца мажи осомничени за нападот, а за еден се вели дека е роден во Пакистан.
18-годишник, кој се обидел да избега со метро, бил фатен на блискиот плоштад Бастилја, со траги од крв на лицето. Малку понатаму, уапсен е уште еден човек, кој бил виден со него за време на нападот.
Засега е нејасен мотивот за нападот, како и дали има врска со сатиричниот магазин Шарли Ебдо, кој се пресели во нови канцеларии по нападот од исламските екстремисти во 2015 година.
Судскиот процес за терористичкиот напад на Шарли Ебдо е во тек. Вдовиците на напаѓачите во редакцијата треба да сведочат.
Судскиот процес започна на 2 септември пред специјалниот суд во Париз, повеќе од пет години по крвавите напади на џихадистите врз просториите на весникот „Шарли ебдо“, полицајци и еврејски супермаркет во кои беа убиени 17 лица.
Група од 14 лица е обвинета за обезбедување логистичка поддршка на браќата Саид и Шериф Куаши и Амеди Кулибали, извршители на нападите што започнаа серија џихадистички напади во Франција.
Според медиумите, ова историско судење, кое се одржува под високи безбедносни мерки, треба да заврши на 10 ноември.