265
„Како и секогаш кога е ДПМНЕ во прашање, не се престанува со креирањето на лажни вести“, вака градоначалникот на Скопје, Петре Шилегов ја коментираше прес-конференцијата на портпаролот на ВМРО-ДПМНЕ, Димче Арсовски, на која го обвини дека во град Скопје се вработува личен возач на Петре Шилегов, кој е роден 2001 година и треба да вози нов автомобил со високи перформанси, иако законот не го дозволува тоа.
Според градоначалникот, најголемата опозициска партија дека „ги боли успехот на градските политики во изминативе 3 години (и нив, а и богами и на некои самопрогласени “експерти” за Градот), но тоа никако не би смеело да биде причина за свесно лажење“.
„Еве и официјално: Петре Шилегов немал, нема и ќе нема 19 годишен шофер. Ама лагите не се ништо ново за оваа и ним блиските структури. Што да им каже човек ? Вие продолжете со креирање на лажни вести, јас ќе продолжам со развој на Градот и градските политики. И допрва ќе ве болат градските политики…“, одговори Шилегов.
Претходно, Арсовски посочи и дека се вработува и раководител на Секторот за заштита на животна средина.
„Ниту се видело ниту се чуло раководител во сериозна институција како град Скопје да биде вработен на определено време. Ова е апсурд најголем на свет, бидејќи оној што треба да биде одговорен за цел еден сектор со вработени не е со постојано вработување во Град Скопје“, рече портпаролот на ВМРО-ДПМНЕ.