Првата вакцина што е призната за масовна употреба во Велика Британија и Европската унија е „Фајзер“.
Сепак, вакцината не треба да се дава на лица со алергии, бремени жени и деца на возраст под 16 години.
Зошто?
Како и сè, вакцината против ковид може да предизвика несакани ефекти кои во повеќето случаи се благи и исчезнуваат за неколку дена. Сепак, Британскиот комитет за вакцинација и имунизација (JVCI) предупреди дека има групи на луѓе на кои нема да им се дава вакцината Фајзер / Бионтек.
Деца под 16 години
Сè уште нема доволно докази за тоа како вакцината Фајзер влијае на децата. Вакцината е тестирана на возрасни, а тестирањето на деца не било на приоритетната листа затоа што ако се заразат со вирусот, тие обично имаат благи симптоми или воопшто немаат.
Бремени жени
Бремените жени или жените кои планираат да забременат не треба да примаат вакцина бидејќи потенцијалните ризици не се познати.Британскиот комитет за вакцинација препорача бремените жени да не се јавуваат во службите за итни случаи за да примат вакцина од слична причина како и децата.
– Сè уште нема податоци за безбедноста на вакцината против ковид во бременоста, ниту од студии врз луѓе или животни. Со оглед на недостаток на докази, потребна е претпазливост, затоа на бремените жени не им се препорачува да се јават – се наведува во нивната изјава.
Секако, во наредниот период ќе се спроведат понатамошни истражувања на оваа тема.
Луѓе со алергии
Предупредувањето дојде откако двајца здравствени работници во Велика Британија добија силна алергиска реакција на вакцината.
Агенцијата за регулирање на лекови и здравствени производи (МХРА) издаде предупредување дека никој со историја на „значајни“ алергиски реакции на лекови, храна или вакцини не смее да се имунизира.
– Како што е вообичаено за новите вакцини, МХРА, како мерка на претпазливост, советуваше луѓето со значителна историја на алергиски реакции да не примаат вакцина Фајзер. За среќа, здравствените работници кои доживеале анафилактичен шок се опоравуваат и се добро – рече проф. Стивен Повис, медицински директор на британската Национална служба за јавно здравје.