Заев се прости од Хаџиманов со песната „Љуби ме и главата горе“

Премиерот Зоран Заев преку својот Фејсбук се прости од Зафир Хаџиманов

-Со длабока тага ја примив веста за смртта на Зафир Хаџиманов.

Замина голем човек на кој сцена му беше целиот негов живот. Како музичар и естраден уметник, како филмски глумец и шоумен остави песни за паметење и оживотвори впечатливи ликови на филмското платно.

Годините не го запреа за да ги растегнува своите граници како уметник кој експериментираше со мултимедијални дела, со поезија и прозни записи.

Во нашите срца и сеќавања засекогаш ќе останат неговиот ведар лик и дух кој инспирираше и радуваше.

Замина, а зад него остана ехото на стиховите:

Многу дни пребродивме ние

како чун на немирно море

насмеј се на ветрот што бие

љуби ме и главата горе,

насмеј се на ветрот што бие

љуби ме и главата горе, напиша Заев.

На 78 годишна возраст, како резултат на компликации од болеста ковид-19, во Белград почина македонскиот уметник, пејач и композитор, Зафир Хаџиманов.

Хаџиманов по потекло е од Кавадарци, но долги години живееше во Белград каде беше во брак со српската пејачка Сенка Велетанлиќ-Хаџиманов. Тој, исто така, дипломирал на Факултетот за драмски уметности во Белград.