Владата предводена од СДСМ во услови на здравствена и финансиска криза предизвикана од светската пандемија, создаде економски пакети коишто се состојат од низа мерки со цел полесно справување со последиците од коронакризата врз стопанството, населението, работниците, младите и многу граѓани од други категории, велат од СДСМ.
Оттаму додаваат дека со досегашните мерки, стотици илјади луѓе ги задржале работните места, а поддршка добиле илјадници компании.
-Владиниот одговор на фискалната политика на пандемијата беше експресен и далекосежен за претпријатијата и вработените во најпогодените дејности како и за најранливите категории на граѓани.Владините економски мерки директно придонесоа за ублажување на негативните последици врз доходот и потрошувачката на домаќинствата, како и активноста на деловните субјекти.Фискалниот стимул на досегашните мерки изнесува 704 милиони евра, односно 6,5% од БДП, велат од партијата.
Од СДСм велат дека четирите сета економски мерки имаат дадено значителен придонес и за ублажување на последиците во однос на стапката на невработеноста.
-Целта е постигната, досегашните антикризни економски мерки ги дадоа предвидените резултати.
Во првото тромесечје на минатата година стапката на невработеност порасна од 16,2% на 16,7%, додека во третото и четвртото тромесечје се забележува етапно намалување на 16,5% и 16,1%, со што просечната стапка на невработеност во 2020 изнесува 16,4%.
Раст од 7,8% се забележува во однос на просечната месечна-нето плата во 2020, како директен резултат на корисните економски мерки спроведени од владата на СДСМ пред пандемијата.
Преку петтиот пакет мерки продолжува поддршката за најпогодените од пандемијата, односно финансирање на малите и средни претпријатија и средно пазарно капитализирани претпријатија, а истите ќе се реализираат и со договор помеѓу Европската инвестициона банка и македонската Развојна банка, со што сто милиони евра ќе се инјектираат во нови проекти, нови вработувања, зголемената ликвидност на стопанството и зголемен извоз.
СДСМ и натаму останува посветена на креирање и имплементација на мерки и политики што ги амортизираат штетните последици од коронакризата, велат од партијата.