„Постои решение за сè, но треба да го изберете вистинскиот момент. Кога има избори на Балканот, тоа се тешки моменти, тешко е да се решат, а тие беа во Бугарија сега. Се разбираме исто како и со Србија, зборуваме слични јазици и верувам дека ќе најдеме разумно решение“, вели премиерот Зоран Заев во интервју за српски „Курир“.
Според него, кога ќе ги прашаат бугарските власти: „Зошто не го признаваат нашиот македонски јазик?“, тие велат: „Не, ние ја прифаќаме таа реалност, но да видиме кои се корените“. Имаме заедничка историја, цела Европа има заедничка историја, а камоли на Балканот. Од истата историја се создадоа нации – македонски, српски, бугарски, хрватски, сè.
На прашањето колку ќе чини слободното движење на српските граѓани во Македонија и фактот дека не треба да плаќаат патарина од 25 јуни до 15 август, како знак на благодарност за донираните вакцини, премиерот Заев вели:
„Нашите проценки велат дека се работи за 2,5 милиони евра, но е во ред. Тоа ќе го надомести нашата компанија за патишта. Вредноста на донираните вакцини е 700.000 евра“, додава премиерот.