Српскиот претседател Александар Вучиќ рече дека Грција го уверила Белград дека нема да ја признае независноста на Косово, но дека развојот на односите меѓу Атина и Приштина „секако не е најдобрата вест“ за Србија.
„Не би сакал да зборувам однапред дури и пред да знаеме нешто. Бидејќи има некои промени во односите, очекувам да видам дали тоа е само трговска канцеларија или нешто повеќе меѓу Грција и Косово, како што велат тие, односно Приштина и Атина. Ќе видиме како ќе биде, па ќе ја информираме јавноста“, изјавил Вучиќ за ТВ Пинк.
Српскиот претседател вели дека „во следните денови ќе има големи и важни консултации“ во Белград за Косово и дека потоа очекува продолжување на дијалогот со Приштина во Брисел, со медијацијата на ЕУ.
Запрашан за шпекулациите дека Франција „ќе ја преземе диригентската палка“ кога станува збор за дијалогот меѓу Белград и Приштина, тој посочил дека ќе разговара за тоа во наредните денови и дека е важно за Србија да ги заштити своите државни и национални интереси.
„За сè друго во наредните денови. Ќе има големи и важни консултации како тука во Белград и потоа очекувам продолжување на дијалогот во Брисел“, додал Вучиќ.