Откако по вчерашната седница на Извршниот одбор на СДСМ, aктуелниот скопски градоначалник, Петре Шилегов се најде на листата на првите 30 потврдени кандидати за градоначалници, јавно се заблагодари на партијата.
„На седницата на Извршниот одбор на СДСМ која се одржа вчера и официјално беше потврдена мојата кандидатура за градоначалник на Скопје на претстојните избори. Упатувам огромна благодарност до мојата матична партија за довербата и поддршката. Скопје го заслужува најдоброто, продолжуваме заедно во нови победи“, напиша Шилегов на фејсбук.
На овие локални избори, исто како и на претходните, СДСМ заедно со граѓаните ја креира најдобрата програмска и кадровска понуда за секоја општина, соопштија од СДСМ.
– По спроведените испитувања на јавното мислење, анализите и истражувањата, консултациите со членството, Извршниот одбор на синоќешната седница ги дефинираше првите 30 кандидати за градоначалници од редовите на СДСМ.
Сите кандидати за градоначалнички и градоначлници кои беа синоќа објавени во првата фаза се дел од најдоброто, блиски до граѓаните, чесни, одговорни индивидуи, со конкретни планови и решенија, секој за својата општина.