Словачката претседателка Зузана Чапутова денеска во Скопје изјави дека Словачка со Северна Македонија ќе ги сподели сите искуства од пристапните преговори со ЕУ и истакна дека двете земји имаат одлични билатерални односи.
„За среќа, преговорите почнаа пред неколку месеци и верувам дека како две земји членки на НАТО наскоро ќе бидеме заедно во ЕУ. Словачка континуирано ги поддржува вашите напори за пристапување и ние сме подготвени да ги споделиме сите наши искуства во таа област и да разговараме за следните чекори. Многу работи не поврзуваат, имаме одлични билатерални односи, вклучително и заедничка историја“, рече Чапутова на заедничката прес-конференција со претседателот на Северна Македонија, Стево Пендаровски.
Претседателката на Словачка истакна дека го почитува односот на Скопје кон ситуацијата во Украина.
„Мислам дека помошта што и ја давате на Украина е моќен гест да им се придружите на земјите кои ги делат истите вредности и се против руската агресија во Украина“, рече таа.
Чапутова посочи дека одличните билатерални односи се одлична основа за продлабочување на соработката и затоа во нејзината посета биле вклучени луѓе од бизнисот, невладините организации и науката.
Пендаровски оцени дека оваа посета на словачката претседателка потврдува позитивен тренд во развојот на билатералните односи, колку што доаѓа во моментите кога процесот на пристапување во ЕУ веќе започна.
„Словачките искуства во процесот на пристапување во Унијата се добредојдени, што ќе ни биде од голема помош во тој процес“, рече Пендаровски.
Тој најави дека Северна Македонија ќе отвори амбасада во Словачка до крајот на септември и изрази уверување дека тоа ќе придонесе добрите односи меѓу двете земји да се подигнат на уште повисоко ниво.
„Сакам да изразам уверување дека во наредниот период односите меѓу Северна Македонија и Словачка ќе се издигнат на уште повисоко ниво, а за тоа ќе придонесе и отворањето на амбасадата во Братислава, покрај заедничките европски вредности и блиски културни и духовни врски. Во текот на овој месец очекувам нашиот прв вонреден и ополномоштен амбасадор да ја преземе функцијата во главниот град на Република Словачка“, рече Пендаровски.
На средбата во „Вила Водно“, како што соопштија, Чапутова и Пендаровски разговарале за интензивирање на економската соработка, како и за подобрување на билатералните односи во повеќе области, вклучително и науката и културата, како и за состојбата во Украина и последиците од неа.