Комисијата за надворешна политика на Европскиот парламент со мнозинство гласови усвои извештај во кој се бара пристапните преговори со Србија да бидат условени со усогласување на официјален Белград со надворешната и безбедносната политика на Европската Унија, т.е. со воведување санкции против Русија.
Во извештајот се наведува дека е неопходно да се даде приоритет на усогласувањето на земјите кандидати со заедничката надворешна и безбедносна политика на ЕУ.
„Преговорите за пристап со Србија треба да се унапредат само доколку земјата ги почитува санкциите на ЕУ против Русија и постигне значителен напредок во реформите неопходни за ЕУ“, се наведува во извештајот што беше усвоен денеска.
Европратениците ја повикаа Србија систематски да се придржува кон рестриктивните мерки и политика на ЕУ кон Русија и да покаже напредок во демократијата, владеењето на правото и да ги прифати вредностите и приоритетите на ЕУ.
Тие, исто така, повикаа да се преиспитаат сите фондови на ЕУ за Србија, особено сите проекти финансирани според економскиот и инвестицискиот план за Западен Балкан, со цел да се осигура дека сите трошоци на ЕУ се целосно во согласност со стратешките цели и интереси.
Споменатиот извештај треба да оди на пленарна седница на Европскиот парламент во ноември, а доколку биде изгласан ќе стане официјална резолуција. Резолуциите на Европскиот парламент се советодавни за другите институции на ЕУ, како што се Европската комисија и Европскиот совет.