Сателитски снимки покажуваат дека Русија го зголемила бројот на стратешки бомбардери способни да носат нуклеарно оружје кои се стационирани во руската воздухопловна база Оленија на северот на земјата, недалеку од норвешката граница, пишува Дејли мејл.
Во базата, која се наоѓа на 120 километри јужно од Мурманск, моментално се сместени седум суперсонични бомбардери Туполев Ту-160 и четири Туполев Ту-95.
За споредба, на 12 август таму немаше ниту еден, а само девет дена подоцна имаше четири бомбардери.
Информациите за зголемувањето на бројот на бомбардери во Оленија ги пренесе норвешката веб-страница за проверка на факти Faktisk.no, а нивните тврдења ги поткрепија со сателитски фотографии направени од американската Planet Labs PBC.
НАТО во петокот соопшти дека во понеделник ќе ја започне својата годишна нуклеарна вежба „Steadfast Noon“, со 60 авиони кои ќе учествуваат во тренажни летови над Белгија, Северното Море и Велика Британија за да вежбаат користење на американски нуклеарни бомби, распоредени во Европа.
Нуклеарните вежби – кои не вклучуваат вистински бомби – се одржуваат во услови на зголемени тензии откако Русија постојано се заканува со нуклеарни напади во Украина по големите воени неуспеси на бојното поле таму.
„Steadfast Noon“ најверојатно ќе се совпадне со годишните нуклеарни вежби на Москва, наречени „Гром“, кои обично се одржуваат кон крајот на октомври, во кои Русија ги тестира своите бомбардери, подморници и ракети способни да носат нуклеарно оружје.
НАТО соопшти дека вежбите на Западот не биле поттикнати од последните тензии со Русија.