Немирите во јужна Турција ги попречија спасувачките напори на неколку места по смртоносниот земјотрес во понеделникот, соопштија три спасувачки групи, цитирани од Би-Би-Си. Бројот на загинати во Турција и Сирија надмина 28.000, а надежите за пронаоѓање повеќе преживеани се намалуваат и покрај неколкуте случаи опишани како чуда.
Германските спасувачи и војници од австриската армија ги прекинаа операциите за пребарување во саботата, наведувајќи ги како причина судирите меѓу неименувани групи.
Безбедносната ситуација се очекува да се влоши бидејќи резервите на храна се намалуваат, рече еден спасувач.
Турскиот претседател рече дека ќе ги искористи итните овластувања за да го казни секој што го прекршува законот.
Портпаролот на австриската војска рано во саботата изјави дека судирите меѓу неидентификувани групи во провинцијата Хатај го принудиле персоналот на силите за одговор при катастрофи на вооружените сили на Австрија да побараат засолниште во камп со други меѓународни организации.
„Има зголемена агресија меѓу фракциите во Турција“, рече потполковникот Пјер Кугелвајс.
Неколку часа откако Австрија ги прекина спасувачките напори, министерот за одбрана на земјата рече дека турската војска понудила заштита, дозволувајќи им на операциите за пребарување да продолжат.
Германскиот огранок на организацијата ИСАР и Германската Федерална агенција за техничка помош, исто така, ги прекинаа активностите, наведувајќи ги безбедносните грижи.
Бројот на жртвите од силните земјотреси во Турција, кои ја погодија и соседна Сирија, може да се удвои или уште повеќе, изјави во меѓувреме шефот за хуманитарна помош на ОН Мартин Грифитс, кој го посети турскиот град Кахраманмараш, во близина на епицентарот на земјотресот со јачина од 7,8 степени, објави АФП.
Бројот на жртви во Турција и Сирија сега изнесува вкупно 28.191. „Сигурен сум дека тој број ќе се удвои, па дури и ќе се зголеми уште повеќе“, изјави Грифитс за Sky News. „Сè уште не сме почнале навистина да ги броиме мртвите“, додаде тој.
Според ОН, на најмалку 870.000 луѓе им е потребна топла храна во Турција и Сирија. Само во Сирија до 5,3 милиони луѓе може да останат без покрив над главата поради земјотресот, забележува БТА.